కవిత్వం మీద రెండు కవితలు

1.
మేఘాల భారాన్ని
చినుకుల్లోకి అనువదించేసే
ఆకాశానికి తెలుసు
అసలు రహస్యం

2.
లోపలి సంగీతానికి
అనుగుణంగా నర్తించే
అక్షర నక్షత్రాల
మ్యూజికల్ ఫౌంటైన్ !

పంకా

నిన్ను తిప్పుతున్న శక్తి నీది కాదు
ఆ గాలిని కూడా నువ్వు సృష్టించట్లేదు
ఆ మాత్రం దానికి
అంతలా బడబడలాడాలా?

ఆమె కళ్ళల్లో..

ఎందరి దుఃఖాన్ని
మేఘంగా ధరించిందో
ఆమె కళ్ళల్లో..
శతాబ్దాల వాన

ఆకాశంలో
మెరుపు మెరిసాక
వాన కురిస్తే

ఆ కళ్ళల్లో
వాన వెలిసాక
మెరుపు మెరుస్తుంది

ఏ గుండెలోని చీకటిని
నిలువుగా చీల్చడానికో!