పదచిత్రాలు

జోరుగా వర్షం పడుతుంటే
గొడుగున్న వాడి
ధైర్యం


చలికాలపు ఉదయం
ఒంటిమీద
చన్నీళ్ళు పడ్డప్పటి
ఉలికిపాటు

జారుడుబల్ల
కిందనుంచి పైకెక్కే
పసికాళ్ళలోని
పట్టుదల


పల్లెటూరిలో ట్రాక్టర్ వెనక
అలుపెరుగక పరుగెత్తే
చిరిగిన నిక్కర్ల
అమాయక ఆనందం


ఒక్కొక్కరికే ప్రశ్నాపత్రాలు
అందిపోతుంటే
ఆఖరి బెంచీలో పెరిగే
ఆతృత


ఎక్స్ ప్రెస్ రైలు
ఆగకుండా వెళ్ళిపోతే
మారుమూల ప్లాట్ ఫాం
నిర్లిప్తత


దురదేసినా గోక్కోలేని
గోరింటాకు చేతుల
నిస్సహాయత


కచేరీలో
ఒక చేతినుండి మరొక చేతికి
ప్రవహించే చప్పట్లలోని
ప్రేరణ

చన్నీటిజల్లులో
స్నానం చేస్తుంటే
దేహంపై మెరిసే
నీటిబొట్లలాంటి
జ్ఞాపకాలు


గాయం మానాక
పొరలు పొరలుగా చిగురించే
కొత్త చర్మంలాంటి
ఆశ


26-12-2004

( ఏటి ఒడ్డున కవితా సంకలనం నుంచి... )